El conceyu de Noreña tien nicios d'asentamientos prehistóricos que daten del Neolíticu (va unos 5000 o 4000 años). Trátase de los túmulos de La Pasera, construcciones funeraries de les primeres comunidaes humanes que poblaron esti territoriu.

Ente más de 300 documentos conocíos, correspondientes al periodu que va de magar empieza la Monarquía asturiana hasta'l s. XII, nun figura Noreña como nome de llugar, fechu que podría significar que'l nome del ríu Noreña, más vieyu que'l de la villa, aplicóse a ésta en tiempos posteriores, porque sí existen documentos escritos que faen referencia al ríu Noreña yá nel s. X.

Nun va ser hasta'l s. XII cuando apaez esta como llugar pobláu nuna donación de Gonzalo Peláez y la so muyer Elvira Pérez al monesteriu de S. Vicente d'Uviéu, pero tamién los documentos d'esta dómina paecen indicar que s'atopaba enclavada nel territoriu o xurisdicción de Siero.

Según la obra de Trelles "Asturias Ilustrada", l'orixe de la xurisdicción de Noreña atópase na "era del 1027 (añu 989)" y afírmase que'l primer señor de Noreña foi Diego Álvarez de las Asturias, casáu con Jimena, fía d'Alfonso V de Llión, que dio como dote a la so fía'l señoríu de Noreña. D'esti matrimoniu, según esta historia, nació una fía llamada tamién Jimena que dicen "casó con el esforzado D. Rodrigo Díaz el Castellano a quien vulgarmente llamamos Cid". La verdá ye qu'esta versión ye la más aceptada popularmente polos noreñenses.

Sicasí, los estudios más actuales establecen que l'orixe del enclave señorial (con xurisdicción independiente) tuvo vinculáu al llinaxe de Rodrigo Álvarez de Asturias (s. XIII - XIV). Los xenealoxistes dende'l s. XVII suelen mentar como señor d'esta villa y términos al padre de Rodrigo, Pedro Álvarez de las Asturias, mayordomu mayor del rei Sancho IV, pero lo cierto ye que nun existe nengún documentu en que conste que don Pedro tuvo tal señoríu, polo que, compartiendo los estudios de Juan Uría Ríu, el primer señor de Noreña foi'l so fíu Rodrigo, que dexaría n'heriedu'l Solar de Noreña a Enrique II, Conde de Trastámara y futuru Rei de Castiella (fíu illexítimu d'Alfonso XI).

Va ser el so fíu, D. Alfonso Enríquez, el que lleve pela primer vez el títulu de Conde de Noreña, pero depués de rebeliones socesives contra so padre y contra'l so hermanu Xuan I, van derrotalu militarmente, reincorporándose Noreña a la Corona.

Xuan I en 1383 concede "la casa de Noreña con su aldea y sennorio" al obispu d'Uviéu D. Gutierre de Toledo en pagu al so apoyu a la causa del rei y la so oposición al conde. El privilexu a favor de la Mitra y Ilesia d'Uviéu otorgóse nes Cortes de Segovia "a vente de septiembre Era de mil cuatrocientos y veinte y uno, qu es año de mil trescientos y ochenta y tres" y va durar hasta mediaos del s. XX, ostentando los obispos el títulu de Condes de Noreña. Na obra "Armas y linajes de Asturias y antigüedaes del Principado", de Tirso de Avilés, dizse qu'esta acción del rei Xuan I recibióse na villa con gran disgustu, esteriorizando los sos vecinos la contrariedá con esta espresión persignificativa: "Con mal va Noreña que, con pendón y caldera, es fecha sierva de Iglesia".

Los señores nuevos diben tener nos sieglos socesivos tensiones de contino colos sos alministraos, ensin que faltaren actos violentos, xeneralmente por cuestiones tributaries. Tamién los enfrentamientos ente la Ilesia y l'alministración civil d'Asturies tendríen ún de los sos escenarios principales na villa de Noreña al ser sitiu d'abellugu del preláu. Asina, a primeros del s. XVI, el correxidor d'Asturies, Pedro Manrique de Lara, ordena valtar el castiellu de Noreña.

Ye de destacar que tres la desamortización de xurisdicciones eclesiástiques llevada a cabu cuando'l reináu de Felipe II, el condáu episcopal de Noreña va ser l'únicu enclave calteníu pola Mitra.

D'esta singularidá derívase que nos primeros conceyos de la Edá Moderna, l'alcalde mayor y el teniente d'alcalde nomábalos l'episcopáu cada trés años.

En 1826, una Real Orde suprime los cotos y xurisdicciones señoriales, colo que Noreña perdía'l calter de Conceyu con que cuntaba baxo'l señoríu obispal, pasando a pertenecer al Conceyu de Siero. Sicasí, en 1833, por cuenta de que la separación alministrativa taba bien enraigonada, llogra la independencia municipal. Hai que destacar que los obispos siguieron ostentando'l títulu de Condes de Noreña, con calter honoríficu, hasta 1954, siendo l'últimu conde monseñor Francisco Javier Lauzurica.

Dende'l s. XVI hasta primeros del XX, Noreña destaca pola so industria artesanal: el curtíu de cueru y el calzáu, pa depués tener como fonte económica principal la industria chacinera, que medra aguiyada pola construcción d'un mataderu en 1944.