Noreña ye villa de tradición artesana y industrial bien vieya.

Los pegollos históricos de la economía noreñense faen referencia al gremiu de zapateros y curtidores de piel, algamando'l puntu cimeru en cantidá a mediaos del sieglu XIX. Esta situación allárgase hasta primeros del sieglu XX, menguando dende entós hasta la so desapaición.

La desapaición de la industria del curtíu y del calzáu dio pasu a l'apaición y desenvolvimientu de la industria cárnica, siendo la primer industria d'esta especialidá la fábrica emblemática de La Luz, creada allá pel añu 1882.

Ocupa Noreña una superficie de 6 km², lo que fai que seya'l conceyu n'estensión más pequeñu del Principáu d'Asturies, y el cuartu en densidá de población, tres Avilés, Xixón y Uviéu. Esti territoriu tan escasu fai que'l númberu de d'empleos na agricultura y ganadería seya de namás una trentena. Na actualidá existe una ventena d'empreses nel conceyu directa o indirectamente lligaes a l'actividá comercial rellacionaes cola carne, con un númberu total de 360 empleos.

Nos últimos años, a pesar del calter industrial de la villa, ye dominante'l sector terciariu, nel que más de 1000 empleos tiren pa riba del sector servicios (Sanidá, Educación, Servicios Sociales, etc.). El desenvolvimientu urbanu y la integración metropolitana dan una continuidá a esta medría.

Otres aportaciones importantes a la economía del Conceyu failes el sector hoteleru y hosteleru, que, con capacidá, tradición y cada vez meyores instalaciones y servicios, supón una más que curiosa ufierta pal turismu, tanto'l residencial como'l gastronómicu principalmente.

Noreña tamién dispón d'otres rames d'actividá económica como la industria tresformadora de metal, la construcción, el comerciu, el tresporte y comunicaciones, amás de los servicios financieros y empresariales.

Too ello fai qu'económicamente'l conceyu de Noreña seya de los más potentes d'Asturies, lo que, xunío a la so situación estratéxica y la medría siguida de la población, llévalu a ser el 6.^u conceyu d'Asturies de más renta per cápita, depués d'Uviéu, Castrillón, Llanera, Xixón y Mieres.

El conceyu de Noreña tien una población total de 5.429 habitantes a 17 de marzu del 2014, de los que 2.625 son homes y 2.804 muyeres. Ta adscritu al partíu xudicial de Siero.