ESCUDU.

Terciáu en faxa:

1. Xaqueláu de quince pieces, d'oru y veros.
2. En plata, trés faxes de gules; bordura xaquelada de plata y sable.
3. N'azur, la Cruz de los Ánxeles, d'oru y piedres precioses, acompañada de dos ánxeles n'adoración, tamién d'oru.

Al timbre, la corona de conde, superada del capiellu del obispu.

Trai'l primer cuartel d'esti escudu les armes de los Álvarez de las Asturias, en representación d'esta familia tan poderosa y particularmente d'ún de los sos miembros, don Rodrigo Álvarez de las Asturias, señor xurisdiccional de Noreña, personaxe de gran relieve nos reinaos de Pedro I "El Cruel" y d'Enrique II.

El segundu cuartel de les armes de don Gutierre de Toledo, primer obispu d'Uviéu qu'ostentó'l títulu de Conde de Noreña. Esti títulu yá s'usare, ensin calter hereditariu, pol príncipe Enrique de Trastámara, conde de Xixón y de Noreña, protexíu y herederu del yá mentáu D. Rodrigo Álvarez de las Asturias.

Dende don Gutierre de Toledo, el títulu de Conde de Noreña permaneció xuníu al d'obispu d'Uviéu, hasta que'l Conciliu Vaticanu II prohibió a los dignatarios de la Ilesia Católica l'usu de los títulos nobiliarios.

El tercer cuartel constitúyelu l'emblema o señal del obispáu d'Uviéu, pola dependencia del Condáu de Noreña del mesmu.

"Heráldica institucional y vexilológica del Principado de Asturias"

Uviéu: Serviciu Central de Publicaciones del Principáu d'Asturies, 1994.